Мінздароўя адкарэктавала пералік захворванняў і супрацьпаказанняў, якія перашкаджаюць кіраванню механічнымі транспартнымі сродкамі, самаходнымі машынамі і маламернымі суднамі. Змены не асабліва маштабныя, але некаторым катэгорыям людзей яны істотна спросцяць кіраванне і атрыманне правоў. Пастанову апублікавалі ў сераду, 29 лістапада, на Нацыянальным прававым інтэрнэт-партале.
Большасць правак не кардынальная, у асноўным яны паляпшаюць становішча ахвочых сесці за руль (але не ўсіх). Так, уносяцца некаторыя дадатковыя ўмовы па допуску людзей пасля імплантацыі кардыястымулятара. Пры гэтым тэрмін допуску пасля імплантацыі рэсінхранізавальнай прылады скарочаны з 12 да 3 месяцаў.
Прыводзім асноўныя змены для ўсіх катэгорый транспартных сродкаў.
Псіхічныя разлады
У пераліку псіхічных разладаў і разладаў паводзін, якія з’яўляюцца супрацьпаказаннямі для кіравання, змены такія:
- выключаны арганічны трывожны разлад — ён не перашкаджае кіраваць;
- дададзеныя агульныя разлады псіхалагічнага развіцця;
- дададзеныя разлады паводзін, змяшаныя разлады паводзін і эмоцый.
Пры гэтым людзі з псіхіятрычнымі дыягназамі, як і раней, могуць дапускацца да кіравання транспартам пры пэўных умовах на падставе заключэння медыцынскай камісіі. Унесеная папраўка, што па заключэнні УКК могуць быць дапушчаныя і тыя, хто пакутуе на сіндром Аспергера.
Алкагалізм, наркаманія, таксікаманія
З супрацьпаказанняў, звязаных з ужываннем алкаголю і наркотыкаў, выключаныя такія дыягназы, як вострая інтаксікацыя і ўжыванне са шкоднымі наступствамі (у адпаведнасці з міжнародным класіфікатарам хвароб).
Выключанае патрабаванне пра наяўнасць устойлівай рэмісіі для тых, хто пакутуе на алкагалізм (была 1 год) і наркаманію (3 гады) для іх допуску да кіравання. Цяпер яны могуць быць па заключэнні УКК дапушчаныя адразу пасля спынення дыспансернага назірання пры ўмове захаванасці псіхічных функцый, з перааглядам праз адзін год пры алкагалізме і штогадовым цягам трох гадоў пры наркаманіі.
Заключэнне УКК патрабуецца ў першыя 10 гадоў пасля спынення дыспансернага назірання, а пазней — толькі заключэнне доктара-нарколага.
Для грузавога і грамадскага транспарту (катэгорыі С, CE, D, DE, F, I) допуск да кіравання людзей, што пакутавалі на алкагалізм і наркаманію, цяпер магчымы на тых самых умовах, што апісаныя ў папярэднім абзацы, але для абодвух дыягназаў штогадовую медкамісію трэба праходзіць цягам трох гадоў.
Захворванні нервовай сістэмы
Такі дыягназ, як аднаразовы сутаргавы прыпадак, з супрацьпаказанняў выключаны, у той час як раней пасля яго можна было сесці за руль не менш чым праз два гады з захаваннем цэлага шэрагу ўмоваў.
Значна спрошчаныя патрабаванні для людзей, якія перанеслі аднаразовы эпілептычны прыпадак і пакутуюць на сутаргавы сіндром, што развіўся на фоне вострага паражэння мозгу або арганізма ў цэлым. Пры абодвух дыягназах для допуску да кіравання з апошняга прыпадку мусіць прайсці не менш за два гады пад наглядам дактароў з дыягностыкай для пацверджання іх адсутнасці кожныя паўгода.
Раней дыягностыка патрабавалася кожныя чатыры месяцы, а тэрмін рэмісіі для сутаргавага сіндрому наогул складаў 5 гадоў.
Эпілепсія раней была абсалютным супрацьпаказаннем для кіравання. Цяпер жа людзі з эпілепсіяй могуць атрымаць правы на падставе заключэння неўролага, калі іх эпілепсія ў канчатковай стадыі. Пры гэтым мусяць быць выкананыя пэўныя ўмовы, вызначаныя клінічным пратаколам Мінздароўя для гэтага дыягназу, у тым ліку медыцынскае назіранне, дыягностыка. Праз год праводзіцца пераагляд.
Аднак людзі з эпілепсіяй, сутаргавым і эпілептычным сіндромам, якія перажылі эпілептычны прыпадак, у любым выпадку не дапускаюцца да кіравання аператыўнымі транспартнымі сродкамі, а эпілептыкі — таксама да кіравання таксі.
Для грузавога і грамадскага транспарту (катэгорыі С, CE, D, DE, F, I) допуск да кіравання людзей з вышэйназванымі неўралагічнымі дыягназамі (акрамя эпілепсіі) магчымы пасля пяці гадоў адсутнасці прыпадкаў пры ўмове рэгулярнага назірання, дыягностыкі. З эпілепсіяй кіраваць буйным транспартам забаронена.
Затое да яго кіравання могуць дапусціць людзей, якія перажылі інфаркт мозгу, але мусіць прайсці не менш 12 месяцаў пад медыцынскім назіраннем.
Кіраванне маторнымі маламернымі суднамі магутнасцю большай за 5 конскіх сіл
Унесеныя ў асноўным тыя ж змены, што і для легкавых машын. З дыягназам «эпілепсія» допуску па-ранейшаму не дадуць. Пры гэтым з супрацьпаказанняў для кіравання выключаная глухата.
Пастанова набывае моц 30 лістапада 2023 года.