У дзяржаўнай базе службы занятасці ёсць прапанова наконт працы, дзе заробак дасягае 25 000 рублёў. Але патрабаванні да патэнцыйных супрацоўнікаў сур’ёзныя. «Люстэрка» склала топ-5 самых высокааплатных вакансій.
Двух начальнікаў участка шукаюць у ААТ «Свідравальная кампанія „Дэльта“» (Гомельская вобласць). Адзначым, што пра гэтыя вакансіі абвяшчалі яшчэ летам мінулага года. Прэтэндэнты мусяць мець вышэйшую адукацыю, досвед працы ў сферы агульнабудаўнічых работ не менш за 10 гадоў, трэба ўмець чытаць чарцяжы, складаць каштарысы. Супрацоўнікаў чакае раз’язная праца, па чарзе ў дзве змены. Памер заробку з мінулага года не змяніўся — ад 7500 да 9000 рублёў.
Рытэйлер адзення LC Waikiki яшчэ не закрыў вакансію дырэктара. На гэтую пасаду патрабуецца чалавек з вышэйшай адукацыяй, пажадана мець кваліфікацыю MBA, трэба ведаць англійскую і турэцкую мовы. Таксама вялікія патрабаванні выстаўляюць да досведу працы. Кіраўніку будуць плаціць 12 000−15 000 рублёў.
Авіякампанія «Белавія» доўгі час не закрывае вакансію камандзіра паветранага судна Boeing 747. Наймальнік шукае двух лётчыкаў. Кандыдаты мусяць мець вышэйшую адукацыю і валодаць англійскай мовай на чацвёртым (працоўным) узроўні ІКАО (гэта Міжнародная арганізацыя цывільнай авіяцыі). Пілотам будуць плаціць ад 8000 да 18 000 рублёў.
Намесніка дырэктара шукае ТАА «Хуа Сінь будаўнічая кампанія». Прэтэндэнт мусіць быць з вышэйшай адукацыяй, размаўляць на кітайскай мове, мець аўтамабіль. Яму абяцаюць плаціць 19 000 рублёў.
Самы вялікі заробак — ад 15 000 да 25 000 рублёў — абяцаюць выплачваць намесніку дырэктара ТАА «Бел Хуавэй Тэхноладжыс» (прадстаўнік брэнда Huawei у Беларусі). На гэтую вакансію звярнуў увагу Onliner.by. Кандыдат на пасаду мусіць быць з вышэйшай адукацыяй, дасканала ведаць англійскую і кітайскую мовы, мець досвед працы ў міжнародных тэлекам-кампаніях ад трох гадоў.
Чытайце таксама
