Мабільны аператар А1 збіраецца запусціць новы агрэгатар таксі. Для гэтага кампанія набыла аднаго з удзельнікаў рынку — фірму «Баварыя». Раней гэты мабільны аператар, працуючы пад назвай velcom, ужо рабіў спробу выйсці на транспартны рынак.
«Наш сэрвіс зроблены не зусім з нуля. Пачнём з таго, што мы набылі аднаго з вядомых гульцоў на рынку — кампанію „Баварыя“. Гэта нішавы гулец прэміум-сегмента, які добра разумее, што такое якасць паслуг. Пачаўшы свой шлях як перавозчык і пасля стаўшы агрэгатарам, „Баварыя“ доўгі час (і даволі паспяхова) „змагалася“ з буйным гульцом», — растлумачыў начальнік упраўлення інфраструктурных рашэнняў і кіраўнік праекта «А1 таксі» Яўген Ляўданскі.
Як паведамляецца на сайце кампаніі «Баварыя», яна аказвае транспартныя паслугі як фізічным асобам, так і кампаніям. Сярод іншага — прапануе арэнду аўто як з кіроўцам, так і без яго. Таксама прадугледжаныя паслугі па сустрэчы гасцей з аэрапорта або чыгуначнага вакзала. Яшчэ даступная опцыя «цвярозы кіроўца».
Як паведамляецца, А1 збіраецца запусціць уласную аплікацыю для таксі, цяпер яна праходзіць тэставанне. Мабільны аператар атрымлівае ўсе неабходныя дазволы для новай дзейнасці, а таксама збіраецца стаць плацежным агрэгатарам (мяркуючы са звестак на сайце Нацбанка, пакуль гэтага не адбылося), уступіць у рэестр дыспетчараў таксі.
Як плануецца, паўнавартасна сэрвіс запусцяць у траўні гэтага года.
Нагадаем, гэты мабільны аператар, які раней працаваў пад назвай velcom, у 2013 годзе ўжо рабіў спробу выйсці на транспартны рынак, ён запускаў аплікацыю «Таксі твайго горада». Гэта быў каталог службаў таксі Мінска і іншых буйных гарадоў з поўным пералікам паслуг, нумарамі тэлефонаў, цэнамі і магчымасцю зваротнай сувязі.