Афіцыйную прадстаўніцу Міністэрства замежных справаў Расіі Марыю Захараву падчас брыфінгу 5 красавіка спыталі, ці плануе РФ размясціць у Беларусі стратэгічную ядзерную зброю. Яна ў адказ параіла арыентавацца на папярэднія заявы расійскага прэзідэнта Уладзіміра Пуціна.
Журналістка папрасіла Захараву пракаментаваць заявы Аляксандра Лукашэнкі, які 31 сакавіка, выступаючы з пасланнем беларускаму народу, сказаў, што акрамя тактычнай ядзернай зброі (ЯЗ) Мінск можа папрасіць у Масквы і стратэгічную.
— Параметры развіцця беларуска-расійскага ўзаемадзеяння ў ваеннай ядзернай сферы вось літаральна нядаўна вельмі падрабязна акрэсленыя прэзідэнтам Расіі. Таму да гэтай тэмы мне дадаць няма чаго, — сказала Захарава.
У сваім адказе афіцыйная прадстаўніца МЗС Расіі спаслалася на інтэрв'ю Уладзіміра Пуціна 25 сакавіка, падчас якога ён заявіў, што Масква і Мінск дамовіліся размясціць менавіта тактычную ядзерную зброю на тэрыторыі Беларусі. Пра стратэгічную гаворкі не ішло.
Захарава таксама дадала, што Расія і Беларусь «будуюць у рамках Саюзнай дзяржавы адзіную абаронную прастору».
— І мы маем права вырашаць любыя пытанні забяспечання нацыянальнай бяспекі, якая ўзнікае ў сувязі з абвастрэннем знешніх пагрозаў так, як гэта будзе найлепшым чынам адпавядаць нашым інтарэсам. З лістапада 2021 года дзейнічае, як вы ведаеце, абноўленая ваенная дактрына нашага інтэграцыйнага аб’яднання з Мінскам, у адпаведнасці з якой паступальна пашыраецца нашае ваеннае і ваенна-тэхнічнае супрацоўніцтва. Калі я кажу «нашым», вы разумееце, што гаворка ідзе пра нашае сумеснае. Магчымыя далейшыя крокі будзем строга сувымяраць з эвалюцыяй ваенна-стратэгічнай абстаноўкі, — сказала яна.
