Пад Оршай міліцыя і ДАІ не пусцілі ў Расію фуру. Груз для яе жыхар Міншчыны збіраў некалькі месяцаў

5 жнiўня 2024 у 1722840300
«Зеркало»

Па дарозе ў Расію затрыманая буйная партыя металу, паведамілі ў МУС. Лом коштам больш за 25 тысяч рублёў ехаў у фуры, якую спынілі ў памежжы.

Грузавік у Аршанскім раёне ля мяжы з Расіяй спынілі супрацоўнікі міліцыі і ДАІ. Унутры знайшлі больш за 20 т чорнага лому і каля 4 т каляровых металаў.

«Дакументы на груз 34-гадовы жыхар Міншчыны, які знаходзіўся за рулём, даць не змог. Толькі растлумачыў, што некалькі месяцаў збіраў і скупляў лом у Чэрвенскім раёне для далейшага перапродажу ў Расію», - расказалі ў МУС.

Канфіскаваныя алюміній, медзь, латунь і чорны метал на суму звыш 25 тысяч рублёў. За незаконную прадпрымальніцкую дзейнасць у дачыненні да кіроўцы складзены адміністрацыйны пратакол, які прадугледжвае штраф да 100 базавых велічынь - гэта 4000 рублёў.